獅鷲欺弱旅

猪拉多纳

　　今晚都係兵荒馬亂，而有雷神，有好有唔好，佢有份跑嗰場賽事賠率會側埋一邊，賠率參考價值大減，唔容易睇飛做人。如果閣下今晚又係冇乜心水，都係買細啲為妙，反正機會多的是。

　　第二場四班1200米。「樂有贏」成日好想贏番場，阿文已經扭盡六壬，可惜硬係搏極都係二二三三。今次又睇準條件賽，心態都係希望遇到批弱旅會得手，老實講，呢場對手真係唔多惡，以佢實力，穩位望贏。

　　第五場四班1200米。「紅運飛駒」輸完又輸，呢次轉到谷草，如果又整多鑊，真係咩面子都冇晒，神仙犯不着要咁做，佢又冇着數，對隻馬都冇幫助，所以，呢個決定，用意應該向好，但可以好成點？冇人能夠保證，叻到識飛又得，稍為有小小進步都得，可以相差千萬里，真係冇得計，但如果太熱，就要小心行事。

　　第八場三班1650米。「獅鷲」上次輸畀「火紅人」，實力有距離，當日又有雨，輸得遠啲好平常。今次轉谷草對手冇咁強，排1檔一定會放頭走，放得幾遠，帶唔帶得到，要睇當時環境以及速度控制成點，但B欄點都會放得順過A欄多多聲。陳華棟 資深評馬人