港澳盃大摩鐵角Q

猪拉多纳

　　今日係一年一度埠際賽港澳盃上演日子，此賽唔經唔覺舉辦了十幾屆，雖然以前唔係級際賽，場內外氣氛比依家好得多，時至今日，闊佬懶理，淨係講場內布置，入場馬迷唔打開個排位表，都未必知道係跑港澳盃。

　　每逢跑大盃，馬場內衝線柱嗰個圓形位，通常會圍晒字，標明係咩盃，但呢項年度盛事港澳盃，完全冇見過有類似安排，真係唔知點解。另外，大賽常有所謂打氣團，港澳盃人影都冇隻，唔通冇馬值得打氣？衰衰哋，「競駿」四班馬出賽，都有個公仔走出嚟撐撐場，呢場級際賽論牌頭，論獎金，論吸引力，唔通及唔上一隻四班馬？！

　　唔湯唔水又失禮

　　尚有一個禮儀嘅問題，話晒係一年一度，應該畀吓面客軍，港澳盃呢日宣傳「打吡熱線分獎金」，推遲一周唔通好大問題？與其做到咁，不如算罷啦，乾脆唔搞，好過唔湯唔水。點都好啦，路見不平插幾句啫，去到最後都係一成不變。

　　跑得盃賽，冇理由唔捧大摩，佢今場派馬3匹，「超皇鷹」屆屆嚟捧場，呢次孖住「卡達聖」同「閃爍武士」，實行進攻三叉戟，而呢3匹馬各有分量，賠率又唔會熱，一於吼大摩鐵角Q。(Jack)