|
萬眾矚目嘅西班牙國家打吡殺埋身!西甲一哥巴塞隆拿今晚坐鎮魯營主場迎戰皇家馬德里,不過焦點由以往嘅美斯單挑C朗,變成加入尼馬同加里夫巴利一齊玩雙打。巴塞近期氣勢回落,防線甩漏多,隨時畀皇馬有機可乘,「銀河艦隊」講到明會派天價飛翼加里夫巴利正選上陣,首踢國家打吡誓要爭做主角,加上近五碰頭未輸過,巴塞要讓半一咁多實在過晒火位,下盤真係有買趁早。
(now 632周日凌晨零時直播)
巴塞喺聯賽開季創下8連勝佳績,但喺雙線作戰嘅壓力下,眾將開始出現疲態,特別係美斯早前受傷,令尼馬要連續出場幾乎冇抖過,體能消耗極大,周中歐聯作客AC米蘭,「新比利」多番門前失機,真係踢到腳仔軟。
巴塞防線甩漏多讓唔起
雖然美斯已經傷愈復出,但明顯狀態未足,前場進攻顯得死氣沉沉,最慘係後防連番犯錯,對住AC嗰陣正係中堅馬斯真蘭奴送大禮導致失波,並有傳中路拍檔碧基今仗因傷倦勤,攻不銳,守不穩,呢支已非昔日嘅「地上最強」。
皇馬今季作客的確表現麻麻,但同對手擺出鐵桶陣不無關係。眾所周知,自前任教頭莫連奴調教後,皇馬已變成「神風特攻隊」,在C朗帶領下反擊速度快如閃戰,現任主帥安察洛堤亦蕭規曹隨,依家仲多埋加里夫巴利呢把尖刀,「大聖爺」加盟後抖多過踢為人詬病,如今養精蓄銳,誓要爭做國家打吡新主角,遇着堅持控球在腳嘅巴塞,「銀河艦隊」反而唔使再諗點樣破密集,一於睇準時機打反擊,殺對手一個措手不及。
況且皇馬一改以往被宿敵食住嘅頹風,近五次交手錄得三勝兩和未輸過,信心爆棚,其實佢哋只差巴塞3分,為爭奪聯賽錦標今仗不容再失,眾將一定搏甩髀,仲有得受讓半一咁筍,呢個下盤非常抵玩。
馬天奴(巴塞):我哋會盡可能喺皇馬後半場比賽,令佢哋就算攞到波都離巴塞禁區好遠,進攻嗰陣兩名翼鋒會多啲滲入中路,讓邊衞後上助攻,若果畀人搶甩咗波,兩人就要第一時間向對方進行逼搶,阻延皇馬嘅反擊。
安察洛堤(皇馬):我會繼續用伊拿拉文迪、莫迪歷同基迪拉組成嘅中場線,至於加里夫巴利身體狀況已經冇問題,今仗一定會畀佢打正選,雖然賓施馬上仗歐聯冇波入,但佢盡晒力踢得唔錯,因此中鋒人選已有答案。 |
|