熱刺專搵維拉出氣

猪拉多纳

打吡戰慘敗 喜遇私房菜

今晚英超獨腳戲阿士東維拉主場迎戰熱刺，熱刺無論人腳、往績上都佔優，加上上場恥辱性大敗於倫敦死敵韋斯咸腳下，今仗實搵阿士東維拉出氣，捧客Ｗ。

（now 621周日晚11時直播）

熱刺領隊保亞斯今夏用加里夫巴利一個人換咗一隊波番嚟，買咗成7個球員，基斯甸艾歷臣、拉美拿、蘇爾達杜、荷西保連奴等粒粒皆星，球隊今季加埋踢咗十二場波，大部分嘅新兵都逐漸融入，特別係基斯甸艾歷臣，呢位丹麥中場極速融入球隊，已成球隊進攻核心，首度替球隊上陣對諾域治即貢獻助攻，又曾射入一記美妙絕倫嘅右上角掛網波，盡得球迷歡心，今仗可再成熱刺贏波嘅關鍵。
用番蘇爾達杜醒好多

熱刺上場英超主場輸畀韋斯咸0比3，搞到成地眼鏡碎，今仗對阿士東維拉，成班球員一定唔敢再鬆懈，絕對希望以一場勝仗挽回面子。而且上仗保亞斯無端端出盃賽主力迪科爾打正選，搞到冇乜同佢夾過嘅艾歷臣患得患失，保亞斯知衰，相信會出番蘇爾達杜攻堅，有佢加艾歷臣喺前線進攻，加上近期狀態大勇嘅荷西保連奴後上偷雞，熱刺唔使驚入唔到波。
近兩次作客維拉炒四蛋

阿士東維拉今仗有王牌射手賓迪基傷愈復出，佢自九月以嚟就因腹股溝拉傷而缺陣咗成四個星期，預料狀態冇咁快會操番起，對球隊幫助不大。阿士東維拉雖然上仗英超主場贏咗曼城，但其實球隊對強隊戰績唔係特別好，曾輸過畀利物浦同車路士，而且阿士東維拉喺往績上對住熱刺完全輸蝕，近七次對碰輸咗六場，對上兩場主場仲要畀熱刺大炒4比0，近年完全畀對手食住，今仗都係凶多吉少。

林拔 (阿士東維拉)：箭頭賓迪基已經好番晒，今仗隨時候命，球隊多咗佢簡直係如虎添翼呀！

保亞斯 (熱刺)：球隊上場竟然喺主場畀韋斯咸大炒，隊波一定要以此為鑑，今仗一定唔可以放軟手腳，好彩今場有艾朗連儂復出，係一大喜訊！