熱刺有鬥心「讓主」o岩「素」

猪拉多纳

歐霸盃分組賽24場、48隊今晚大晒冷，焦點賽事熱刺喺K組主場對特林素，讓球主客和「-2」照捧1.85倍「讓球主勝」。雖然熱刺嘅迪科爾因為不滿上陣時間不足，突然同領隊保亞斯反面，但證明現時熱刺陣中嘅競爭好激烈，無論今場邊個落場，想打正選都肯定要交貨，特林素掛住喺聯賽護級等炒！

（有線61、201及廣東體育周五凌晨3:05直播）

咪以為熱刺將加里夫巴利賣到皇馬就唔識贏，查實佢哋瘋狂增兵後，開季6場只係試過以0:1不敵阿仙奴，其餘5場贏晒，當中新簽嘅射手蘇爾達杜同中場基斯甸艾歷臣，暫時喺英超表現都好對辦，搞到賀治比同艾朗連儂幾乎冇碇企，分別畀國際米蘭同紐卡素睇中，由於兵源充足，球員又要爭位，即使要兼顧歐霸盃都唔會太難打。
特林素護級行先

事實上，迪科爾近日公開批評熱刺領隊保亞斯，話唔明點解佢要將全隊最高薪球員艾迪巴約掟落預備組，順便投訴自己不受重用，證明熱刺真係人多到用唔晒，既然蘇爾達杜喺華倫西亞踢慣歐洲賽，今場應該大把世界至啱，再加上熱刺領隊保亞斯曾經帶領波圖奪得歐霸盃，佢冇理由唔重視呢個賽事，附加賽兩回合計派8隻蛋畀第比利斯戴拿模就係證明。

特林素係上季挪超第4名同挪威盃亞軍，只不過得到歐洲足協公平競技獎至有份玩今屆歐霸盃，今季佢哋淪落到要護級，日前喺主場以1:0打沉洛辛堡，取得自6月起首場聯賽勝仗固然係代表作，但現時佢哋只係同倒數第3位嘅史達同分，隨時要打附加賽護級，更衰嘅係要直接降班，唔似有心情同熱刺過唔去，否則降班就頭痕，作客白鹿徑睇怕都係捱打。
歐霸盃K組

歐霸盃賽制

現為分組賽階段，48隊分12組，每組4隊進行雙循環比賽。每組首、次名將躋身32強。