克魯搶冠吸贊助

猪拉多纳

今季英格蘭聯賽錦標決賽周日喺倫敦溫布萊球場舉行，由英甲克魯及英乙修安聯爭奪冠軍。克魯聯賽級數高過修安聯，近況亦較對手好，照計好有機會贏波捧盃。但其實賽績只係周邊因素，大額贊助至係克魯真正贏波推動力。難得喺決賽撞到一支低組別球隊，克魯肯定拚盡全力，主W可留意。

（周日晚8時15分開賽）

自2006年開始英錦標就由英國莊士敦油漆冠名贊助，佢哋亦係英錦標史上贊助年期最長嘅公司，可見揸弗人對呢項賽事有幾重視。克魯班高層好希望透過今場比賽，同莊士敦油漆傾掂球衣胸口贊助。其實英甲只不過係第三級別球隊，要攞到胸口贊助真係唔容易，克魯為改善球隊財政，今晚有必要捧走英錦標，換取贊助單位嘅歡心。

咪以為盃賽贊助商好少同球隊直接合作呀，早年做過英錦標冠名贊助嘅英倫車廠LDV，就曾經成為阿士東維拉合作夥伴，克魯今次能夠同莊士敦油漆傾掂數又有乜出奇。當然啦，大前提係克魯順利砌低修安聯，能夠喺贊助商面前揚威，印象分都高啲。
修安聯未打先認低威

修安聯今季喺英乙表現麻麻，領隊菲臘布朗都喺官網坦言克魯贏波機會較高，叫球迷唔好對修安聯過分期望。呢位前侯城教頭仲話冇咩計，淨係叫球員保持信心喎。