史篤城鋒線死晒火 維拉唔衰得博得過

猪拉多纳

英超踢到近季尾階段，排12位嘅修咸頓至18位嘅阿士東維拉相差只有4分，護級形勢好過睇戲。今晚其中一場護級戰由史篤城主場迎戰維拉，上周維拉領先下畀利物浦反勝痛失3分，跌落榜尾3位置，今場再有差池就認真危，所以佢哋今晚實當決賽咁踢，1.82倍「讓球客勝」值博。

（有線203、303周六晚10:00直播）
史篤城近5戰入得1粒

其實維拉下半季表現改善不少，面對同級對手戰意特別旺盛。論近況，佢哋近6戰取得3勝3負，輸嗰3場係對曼城、阿仙奴同利物浦等實力分子，屬非戰之罪，但對住雷丁、昆士柏流浪等護級對手就全勝。維拉前線繼續由比利時前鋒賓迪基拍住艾邦拉荷，火力有保證。

事實上，對手史篤城近況差到不得了，12場聯賽只贏得1場，對手仲要係榜尾嘅雷丁。佢哋戰績咁差主要係因為班球員唔識將個波送入網度，近5場只有1粒士哥，領隊佩尼斯再唔解決呢個問題，降班威脅只會愈嚟愈大。相信攻擊力較強嘅維拉今仗有力坐和望贏，搶分成功。
張峰來料：阿士東維拉（讓球客勝）