（六）6鹿島搶W賀老大牛一

猪拉多纳

如果你不嬲都信名家嘅話，今日（六）6場日職鹿島鹿角主場對大阪櫻花，不妨博吓個1.75倍鹿島W，事關日本Toto菠菜嘅名家推介，居然偏向近況比較差嘅主隊。

日本Toto同大陸嘅勝和負足彩一樣，每個禮拜揀13場出嚟玩，要全部中晒先贏到頭獎，有一定難度o架。九叔賽前睇過日本嗰邊嘅「予想推介」，發覺命中率最高嘅《Soccer King》編集長岩本義弘（55%）今場齋推介鹿島W，前球員福西崇史、小島伸幸就畀兩瓣─買晒主客勝，而且計埋幾大名家居然冇人推介和波。咁又難怪嘅，鹿島近13次主戰櫻花，開咗7勝6負，根本就未和過。
「怪物」復操 日本名家都撐

查實論近況，客軍櫻花好過鹿島多多聲，開季盃賽連聯賽取得4勝2和1負，相反鹿島6戰得勝和負各兩場，為乜足智彩個賠率以至日本名家都信鹿島多啲呢？首先，佢哋件「怪物」大迫勇也同中川義貴兩個前鋒都傷愈復操，中場大腦小笠原滿男尋日仲34歲生日，班後輩好想贏波賀吓個老大哥。櫻花嗰邊就有後衞山下達也坐波監，中場吉野峻光、藤本康太都有傷，有幾個位要變動。而且今場波可能喺惡劣天氣下進行，以往鹿島試過兩次主場雨戰櫻花都贏2:1，今日W多鋪唔奇。