拜仁半力夠炒法蘭克福

猪拉多纳

贏波即提前6輪封王

拜仁慕尼黑今季喺德甲橫行無忌，晨咁早已經拋甩次席嘅多蒙特幾條街，今晚作客砌低法蘭克福嘅話，更加可以破紀錄提前6輪奪冠，咁歷史性嘅時刻點可以唔捧場先？最重要係拜仁下個禮拜四凌晨要出戰歐聯，為免夜長夢多梗係想快快手手稱霸德甲啦，就算教練軒歷基斯派半力出擊都一樣咁屈機，2.15倍「讓球客勝」撐得過！

（有線61周六晚9:30直播）
爭取勝仗為歐聯打強心針

家陣拜仁領先緊「二哥」多蒙特20分，今晚「蜜蜂兵團」喺另邊廂鬥奧格斯堡一旦失分，就會將聯賽錦標拱手讓畀拜仁，不過拜仁中場梳頓沙基利賽前就話，成班手足都好需要一場勝仗，為下周中歐聯8強次回合鬥祖雲達斯場波振軍心。

隨住中場卻奧斯右腳肌肉撕裂要抖6至8個禮拜，教練軒歷基斯為兼顧歐聯戰線，講明今仗會派遣部分副選兵出擊，話就話半力，但以馬里奧高美斯、洛賓、泰摩斯卓克同雲拜頓呢啲球員嘅「卡士」，要砌低法蘭克福綽綽有餘啦！哥迪奧拿來季就會掌舵，呢班副選兵為博表現「騷哥利」，落到場隨時比一班正選大哥更搶韁。
表現跌Watt正選門將斷手

主隊法蘭克福目前因得失球差唔及史浩克04屈居第5，仲有希望爭取來屆歐聯入場券，戰意同樣唔使懷疑，衰在呢班波近7場聯賽有6場失分，上個禮拜亦只係險勝榜尾嘅格雷特霍夫3:2，表現明顯比起季初跌晒Watt。

最弊係正選門將奇雲查普斷手肯定缺陣，教練艾明費焗住要用雪到硬晒軚嘅肥仔門將尼高洛夫把關，要知道拜仁今季13場德甲作客賽事有10場嘅贏波差距係兩球以上，睇怕尼高洛夫今鋪肯定成身「子彈窿」。
法蘭克福主場不設防

‧雙方最近6次交手有4次開大。

‧法蘭克福今季德甲主場只曾1次保持清白身。

‧拜仁係德甲入球王，27輪聯賽總共轟入78球。
拜仁1.62倍大趁熱食

拜仁呢排入波當食菜，上場聯賽就以9:2炒起漢堡，家陣佢哋根本冇壓力，作客情況都肯定唔會勒住勒住，撞正主張進攻足球嘅法蘭克福教練艾明費，呢場波邊會少波入吖，1.62倍大趁熱食。