馬拉加受讓執多鋪

猪拉多纳

歐聯主場王點會怕蜜蜂

本屆歐聯多蒙特光芒四射，但作客要讓馬拉加？有冇搞錯！歐聯8強首回合，「蜜蜂兵團」造訪馬拉加，客軍唔少戰將已經搏到殘，馬高列奧斯仲要帶傷上陣；馬拉加老鬼多實而不華，今屆主場贏過AC米蘭、波圖，今仗受讓平半，拿仁必捧馬拉加呢個下盤！

（有線62及202台周四凌晨2時45分直播）

近年巴塞橫掃球壇，但去屆「保守足球」代表車路士爆冷擊倒拜仁登頂，唔少球迷都渴望有新攻擊足球代表出現。本屆多蒙特大熟大勇，一條豪華攻擊線馬高列奧斯、馬里奧葛斯、羅拔利雲度夫斯基、巴拉斯塞高斯基個個獨當一面，於分組賽連贏皇馬、曼城，於死亡之組脫穎而出，可謂贏盡掌聲。

不過去到淘汰賽，就係另一個打法，教練高普係有料到，但上圈作客薩克達被撳住砌，最後和波已經好彩，「蜜蜂兵團」仲未到頂級球隊卡士，作客要讓馬拉加真係過火咗喎！

多蒙特搏到殘唔齊腳

多蒙特搏咗大半季，一班主力都已半殘狀態，後防舒姆沙剛被撞爆鼻，菲臘比辛坦拿有傷，中場施雲賓達同「金童」馬高列奧斯於上仗德甲亦因去得太盡身體有問題。雖然佢哋大部分今次可以落場，但要打破馬軍本屆歐聯主場不敗身，好有難度。

睇番馬拉加陣容，逐個秤可能冇對手咁有星味，但個個打仔格好有戰鬥力，迪米捷利斯、祖亞昆、辛達告魯斯、沙維奧拿，個個都經驗豐富，加埋教頭比歷連尼執番靚條防線，根本唔赦對手。唔好忘記仲有西班牙金童艾斯高壓陣，本屆就連挫AC同波圖，主場受讓贏埋仲得。
數讀歐聯

1：馬拉加歐聯第1次面對德國球隊

4：馬拉加今季歐聯5次主場賽事取得4勝1和不敗

5：多蒙特作客西班牙球隊戰績為1勝3和5負

9：多蒙特今季歐聯作客賽事場場有波入，合共攻入9球