艦隊搶W大過天

猪拉多纳

歐聯8強首回合皇家馬德里主場對加拉塔沙雷，係兩軍箭頭基斯坦奴朗拿度及布拉卡爾馬斯一場射手大戰。未計昨晚兩場8強，兩人暫以8球並列射手榜一哥，加上兩軍主攻踢法，即使入球大細中位數係3.5球都照捧大盤。

（有線61及201台周四凌晨2時45分直播）

皇馬主帥莫連奴吸取16強主場贏唔到曼聯嘅教訓後，今仗喺巴拿貝球場出擊，幾大都要搶W，仲希望入多幾球，奠定晉級基礎，否則次回合作客就會好難踢。「銀河艦隊」攻力強橫，淨係C朗一人都足以反轉對手防線。由於佢喺西甲射手榜已落後美斯15球，歐聯成為佢贏番宿敵嘅唯一希望，以C朗目前嘅勇態，並非加拉塔沙雷後防可以抵擋。不過，皇馬有近期大勇嘅中堅華拉尼受傷，用攻強於守嘅沙治奧拉莫斯扼守中路難令人放心，失球機會大增。
兩大射手爭金靴

加拉塔沙雷中前場人才濟濟，除杜奧巴及史奈達之外，仲有今屆一鳴驚人嘅布拉卡爾馬斯。呢位身價僅500萬歐元嘅土耳其國腳，今季喺歐聯大爆發，並獲歐洲足協官網選為今屆分組賽最佳球員，佢今場爭取到入球亦絕對唔意外。

事實上，加拉塔沙雷教練泰林崇尚進攻足球，應會盡量爭取作客入球。入球大細中位數調升至3.5球合理，大盤值得一試。