聖門巴塞鬥踢穩陣波「半場和」好路

猪拉多纳

今晚巴黎聖日耳門主場對巴塞隆拿，爆發黃金右腳大戰鑽石左腳，「左腳王」美斯剛刷新連續19場聯賽有士哥弗到震，但聖門「萬人迷」碧咸右腳七旋斬的威力，絕對可以左右大局，兩代巨星正面交鋒真係好睇過戲。不過，教頭安察洛堤會錫住呢位37歲老將，將佢放在後備席作秘密武器，初段必以穩陣行先同對手打消耗戰。後防不整的巴塞吸收上輪作客輸畀AC米蘭的教訓，今仗作客唔會貿然搶攻，「半場和」不妨一試。

（有線61及201台周三凌晨2時45分直播）

安察洛堤係歐聯專家，深明不能失作客入球的道理，就算今有地利，贏波當然好，但最緊要係以唔失波為大前提，避免次回合作客魯營更難踢。好彩王牌射手伊巴謙莫域獲得歐洲足協減刑，由原本停賽2場減為1場，令佢可以上陣，有伊巴謙在前場牽制作橋頭堡，巴塞後防一定有所顧忌，未必敢谷得太上。
上半場唔敢攻拉布味濃

巴塞在16強次回合逆轉AC米蘭，真係險過剃頭。但「地上最強」已被對手研究得非常透徹，估計安察洛堤會沿用鐵桶陣，以體力化防守及囤兵中路戰術嚟消耗巴塞球員的耐性，然後等待一次反擊攞佢命，因此上半場拉布味濃。

巴塞剛於聯賽畀切爾達逼和，防線不穩的老問題未有改善，中堅碧基狀態曳爆，隊長佩奧爾、艾迪安奴亦因傷倦勤，幸中場大腦沙維趕及復出，算係穩住中場。況且今場只係首回合，吸取上輪作客輸畀AC快速反擊嘅教訓，後防有隱憂的巴塞作客唔會冒進。既然雙方鬥踢穩陣波，隨時陷入拉鋸，「半場和」係唔錯選擇。