國米受讓趁「祖」買

猪拉多纳

力爭下屆歐洲賽資格

今季表現令人失望嘅國際米蘭，嚟到今晚萬眾矚目嘅意大利「國家打吡」火併祖雲達斯，為咗挽回最後尊嚴，肯定會把握地利，力求季內雙殺對手，兼盡最後努力搶番下屆歐聯參賽資格。最緊要係祖記下周中仲有場事關重大嘅歐聯8強戰等緊佢哋，有後顧之憂下仲點讓波，國米受讓平半，我捧1.96倍下盤。

（開賽時間：周六晚10:00）

聯賽爭標無望，歐霸盃又玩完，就連意大利盃喺4強首回合都落入困境、1:2落後畀羅馬，目前排喺意甲第6位嘅國米，家陣最大目標梗係追上第3位嘅AC，攞番個歐聯資格。雖則話AC目前多佢哋7分，但其實係打多國米1場，「藍黑兵團」想話追上都唔算大貪。再者，就算追唔到第3，趕過4、5位嘅費倫天拿同羅馬可以出戰下季歐霸盃都係最基本要求，點到佢哋唔搏命先？
祖雲達斯留力鬥拜仁

仲有，國米今季冇乜成績交差，但話晒首循環佢哋曾經作客輕取祖記3:1，如果今晚喺主場贏多鋪，好好醜醜都叫雙殺呢支準意甲冠軍，算係攞番多少面子。陣容方面，中堅祖安古靴美停賽影響未算太大，仲有馬迪亞斯施維斯達頂上，都算強陣出擊，國際賽期間成班波抖順條氣出戰，係時候打番場爭氣波。

「斑馬兵團」呢邊，近4場贏3場狀態係好，但下周中歐聯作客拜仁絕對唔容許任何閃失，教練干地話就話今場唔會揸流攤，但話冇保留都冇人信囉！守將馬田卡沙利斯早排撞車今場缺陣，基亞連尼接近傷愈上陣成疑，防線有隱憂，唔係話贏就贏o架！