意國打吡撐祖雲達斯

猪拉多纳

因復活節有多項宗教活動舉行，本周所有意甲賽事都安排喺周六晚及周日凌晨一次過進行，其中重頭戲為意大利國家打吡戰，國際米蘭主場對祖雲達斯。國際米蘭今場要殘陣出擊，事關幾位球員滯留喺南美，未必可以喺指定時間返回球隊報到。國際米蘭兵源有限將影響爭勝能力，祖雲達斯作客讓平半捧上盤。

（周六晚10時開賽）
國際米蘭殘陣唔夠砌

國際米蘭陣中有不少球員返到南美參與世盃外圍賽，消息指兩名烏拉圭球員艾華路佩雷拉及加根奴，加上哥倫比亞國腳古亞連都未能喺指定時間返回意大利米蘭，今場難以正選上陣。除此之外，國際米蘭嘅傷停問題亦相當嚴重，祖爾奧比、穆汀加爾及迪亞高米列圖已經提早收咧，中堅祖安古靴美停賽。國際米蘭可調動嘅球員真係唔多，發揮必受影響。

祖雲達斯雖有大量意大利國腳，但要留意「藍衣軍團」近兩場國際賽都喺意大利鄰國瑞士及馬爾他舉行，比如派路、保方及馬治斯奧等球員，完成國際賽後即日已經返到屋企休息，體力應可及時回復，打吡戰可秤先客軍。