爭前4阿仙奴盡摷雷丁

猪拉多纳

周末其中一場英超阿仙奴主場鬥雷丁，雙方都有搶分必要。「兵工廠」仍希望打入積分榜頭4位，而雷丁就繼續為護級而努力。其實現時形勢對雷丁極之不利，和波1分對於護級可謂冇乜幫助，度士相信雷丁今場作客會背水一戰，將防線推前向主隊施壓。不過雷丁三線質素唔高，冒險推進可能造成嚴重後果。度士今場睇好阿仙奴，推介「讓球主勝」。

（有線303及203台周六晚11時直播）

雷丁近況都幾曳，連同盃賽及英超已經錄得六連敗。之前面對曼聯輸波冇人會怪你，但兩場護級關鍵戰役包括主場對韋根及主場對阿士東維拉都跌晒3分，表現令人好失望。雖然球隊有新帥艾堅斯上任，但總唔信佢可以喺咁短時間之內就令球隊由蟲變龍。再講雷丁今季作客賽績特別差，今次作客阿仙奴，度士認為佢哋認真唔樂觀。
首循環炒過5比2

聯賽首循環阿仙奴曾作客炒過雷丁5比2，今輪「兵工廠」返主場出擊應該更加穩陣。縱然中場戴亞比重傷要休息9個月，但因今場對手質素唔高，對於阿仙奴爭勝其實冇太大影響。賽前阿仙奴領隊雲格表示會全力爭積分榜頭4位，亦慎防日後或會以得失球差定排名的可能性，故定會盡可能取更加更多得球。既然對手雷丁係魚腩之一，阿仙奴當然唔會手軟，隨時會大開殺戒，再一次狂勝對手，「讓球主勝」捧得過。