特雷斯登偷布倫瑞克雞

猪拉多纳

德乙二哥布倫瑞克恃住升班形勢大好，近排放軟手腳，僅得箭頭甘比拿爭做神射手較為積極，今輪喺主場對住護級分子特雷斯登又被捧成熱門，梗係靠唔住啦，預期客軍可偷雞搶分，受讓半一捧下盤！

（周五凌晨3時30分開賽）
1860科特布斯夠贏

布倫瑞克今季同哈化柏林甩開晒其他競爭對手，布軍暫時落後哈化一分排第二，甩開第三位凱沙羅頓十一分，取得直接升班席位機會極高。布倫瑞克大把本錢，最近踢落唔多肉緊，歇冬後主場三戰未贏過，佢哋近五戰入四球，全數由隊中首席射手甘比拿包辦，佢以十六球位列射手榜首位，但其他球員行行企企，唔多靠得住。特雷斯登暫列尾三，落後尾四波琴兩分，為護級場場搏盡，鬥志鮮明可秤先。

同日科特布斯主場對阿倫，阿倫歇冬後狀態低沉，對上七戰未嘗一勝，前仗更以一比六大敗於FSV法蘭克福腳下，士氣極曳，無力反彈。至於1860慕尼黑就全力踩油爭奪第三位升班附加賽席位，佢哋近期作客演出更勝主場，對上三次作客贏晒，今場遇上弱旅奧厄阻力唔大，小讓平半要上盤。