「太極虎」寒戰噬卡塔爾

猪拉多纳

冇朴主永又點啫？南韓近排幾個攻擊球員都好弗，加埋天氣凍，對手舟車勞頓幾個利好因素，佢哋今日响世界盃外圍賽亞洲區A組賽事，主場迎戰卡塔爾絕對不勝無歸，1.57倍「讓球主勝」抵博。

（now671、672台及廣東體育周二晚7:00直播）
南韓冇安排友賽集中備戰

响西甲切爾達坐多過踢嘅朴主永，今次落選南韓大軍名單，其實正路到極，事關「太極虎」幾個攻擊球員，好似金信旭、李根鎬、孫弘民、李東國甚至後上嘅李青龍、寄誠庸都狀態唔錯，南韓主帥崔康熙趁住呢幾日國際賽檔期，都冇安排熱身賽，反而匿响坡州訓練中心苦練「4-1-4-1」、「4-4-2」兩套打法，就係準備用快搭高兩個優勢，打爆1月剛啱又換教練、呢次起用咗唔少新人嘅卡塔爾。

對家卡塔爾就冇辦法學似南韓咁悠閒嘞，3日前佢哋喺亞洲盃外圍賽作客巴林輸咗0:1，隨即就要飛赴韓國，連佢哋個教練團隊都認班球員信心受打擊。至慘係中東同南韓嘅氣溫相差好遠，首爾目前得幾度，卡塔爾班兵本身已經唔慣，仲要適應時間唔多夠，想踢得好真係好難，南韓個「長人」金信旭、「中東殺手」李東國同埋當紅射手孫弘民，今晚唔使驚冇波入。

亞洲區A組