奧地利受讓趁早捧

猪拉多纳

世界盃歐洲區外圍賽C組愛爾蘭主場對奧地利，愛爾蘭上周五作客守和瑞典，而奧地利就大炒法羅群島六蛋，兩場靚績確實令人好似唔知點揀，不過，兩軍踢法差異好大，由查帕東尼執教嘅愛爾蘭最鍾意穩守突擊，問題係喺佢手上冇打突擊嘅好前鋒，仲靠緊33歲嘅羅比堅尼，縱使有主場之利但都讓唔起對手，今仗要「讓球客勝」。

（周三凌晨3時45分開賽）

兩軍之前對賽奧地利確係好好多，六戰獲五勝一和，但最近嗰次都係1995年，差唔多廿年前嘅事，參考價值唔高，不如睇番近期嘅賽績。最近幾戰兩軍天壤之別，愛爾蘭三戰全部開細，三場入得兩球，相反奧地利近四戰全大，入咗十一球，原因係兩軍教頭嘅足球哲學完全唔同。
愛爾蘭前鋒冇個掂

愛爾蘭領隊查帕東尼係防守專家，但佢嘅球隊一定要擁有一個極具速度及把握能力嘅前鋒，咁先至可以執行好整套戰術，但睇勻愛爾蘭大軍都冇個咁嘅人喺度，所以球隊喺C組外圍賽踢咗4場只入得7球，試問一支冇入波嘅球隊點取勝先？相反奧地利領隊馬素高拿鍾意進攻，手上亦有不來梅雙雄阿拿奧杜域同祖奴蘇域、拜仁嘅阿拉巴，侵略性強，所以今仗受讓真係好抵玩，有買趁早。