巴西死火 撐俄羅斯

猪拉多纳

史丹福橋67年來首場國際賽

今晚喺倫敦史丹福橋球場爆發重量級熱身賽，由今非昔比嘅巴西火併俄羅斯。「森巴兵團」雖由名帥史高拉利重掌兵符，並且有卡卡、尼馬、奧斯卡杜斯山度士等球星壓陣，但踢落好似散兵游勇唔多對辦，面對擅踢整體戰兼以逸待勞嘅俄羅斯，好難搵到着數，更加冇本錢讓波喇，「讓球客勝」值博。

（中央5台周二凌晨3時30分直播）
森巴兵團後防牙煙

貴為02年世盃冠軍主帥，「大菲」史高拉利今年重掌巴西國家隊，自然令人期望甚高，可惜好似唔多掂喎，佢領軍首仗被英格蘭反敗為勝，上周中領先兩粒之下畀意大利逼和，兩場未贏過認真醜怪。齋睇「森巴兵團」嘅陣容一啲都唔失禮，既有活力四射嘅少壯派尼馬、奧斯卡杜斯山度士，而費特、丹尼爾、施薩索拉斯亦經驗豐富，今次連卡卡都獲得重召，星味十足。不過踢落唔係好對辦，前線球星單靠個人技術硬闖，缺乏有效嘅整體組織配合，毫無默契。「森巴兵團」後防更加問題多多，「大菲」排出丹尼爾、大衞雷斯、丹迪、菲臘路爾斯組成嘅防線，明顯係攻強守弱，尤其係隊長大衞雷斯一向多蝦碌，嘜人又唔緊，車路士領隊賓尼迪斯索性將佢推上防中，費事呢個計時炸彈搞垮防線，但「大菲」依然畀佢擔任中堅，遲早出事。
嚴寒風雪啱晒俄軍

相反，俄羅斯自意大利名帥卡比路上任後，立即為球隊去蕪存菁，就算「沙皇」艾沙維都冇面畀，將呢位在英超坐多過踢嘅阿仙奴球星拒諸門外。深得意國鏈式防守真傳嘅卡帥，亦致力為俄軍打造鋼鐵防線，由伊拿舒域治、安約高夫、比里蘇斯基兄弟為首嘅後防，喺四場世界盃外圍賽一球不失，包括「零封」有C朗助陣嘅葡萄牙，唔講得笑，加上上周世盃外對北愛爾蘭因大雪冇踢，眾將養精蓄銳之下，配合埋倫敦近日風雪嚴寒天氣,瓣瓣都係俄軍着數，「讓球客勝」有2.45倍非常抵玩。