加納炸爆蘇丹

猪拉多纳

外流球星拚盡報國

今晚世界盃非洲區外圍賽壓軸尾場之一，D組擂台躉加納主場迎戰蘇丹。「黑星」加納一向重視世盃外，之前試過怒炒萊索托七蛋，殺聲震天，今仗面對蘇丹，一眾海歸球星如基恩、蒙達利等報國心切，勢必傾力搶攻冇保留，「讓球主勝」捧得過。

（周一凌晨零時開賽）

如果有睇開非洲傳統勁旅踢國際賽嘅球迷，都會覺得好多外流球星搵錢至上，怕受傷難向所屬球會交代，因此踢親太公波，經常出工不出力，好似擁有柏比斯施斯嘅塞內加爾，早前喺世盃外作客畀弱旅烏干達逼和，認真無恥。不過另一支勁旅加納就正氣得多，特別係關乎世界盃決賽周資格分外重視，首仗外圍賽「黑星」在主場大勝萊索托7比0，對住弱旅甚少玩嘢。
召基恩蒙達利衝鋒

雖然加納上仗受制於贊比亞嘅密集防守輸波而回，但贊軍話晒都係上年非國盃盟主絕非善類，輸波反而起到警惕作用。事實上「黑星」只係落後榜首贊比亞3分，今仗贏波便能有機會拉近距離，加上陣中嘅海歸球星好似基恩、卡華禾艾沙姆、蒙達利、梅巴拉克唔單止好波，仲有一顆愛國嘅心，令到佢哋每次為國出賽都分外拚搏，今仗一定會向實力平平嘅蘇丹施展狂轟猛炸，相信蘇軍好難招架得住，「黑星」贏兩粒可謂最低消費，強捧「讓球主勝」。
坦桑尼亞「大」鬥摩洛哥

C組方面，有小組「阿二」坦桑尼亞主場對「小三」摩洛哥，由於小組首名先可晉級，故今仗兩軍定必毫無保留全力搶分，加上摩洛哥踢法有前冇後，大盤有分頭值博。（周日晚8時開賽）

賽制：現為第2圈，40隊分10組，每組4隊，採雙循環制，每組首名進身第3圈。小組賽若出現同分，將順序按以下方式定排名：1.分組賽總球差　2.分組賽中總入球數　3.有關隊伍的對賽成績　4.有關隊伍的對賽球差　5.有關隊伍的對賽得球數　6.有關隊伍的對賽作客入球數（只涉及兩隊同分情況）7.於中立場進行附加賽定排名