韋拿歸位 狂牛搶「芬」

猪拉多纳

西班牙新衫第一擊 世盃外戰火重燃！

「狂牛軍團」強勢出擊！西班牙今晚會着晒新波衫，迎接2013年第1場正式賽事，喺世盃外圍賽I組主場迎戰榜尾嘅芬蘭。今晚「王子」費蘭度托利斯終於「退位」，由狀態大勇嘅韋拿領導鋒線，誓要以一場大勝證明西班牙史上最強前鋒正式「歸位」，就算開到「-2」，1.7倍「讓主」都捧得過！（now632台周六凌晨3:45直播）

要討論西班牙有冇能力衞冕出年嘅巴西世界盃，實在言之尚早，不過「狂牛軍團」近5年以王者姿態奪得2010年世盃，再成功衞冕上年嘅歐國盃，兼且自2012年起就未輸過波，近8場賽事贏足7場，足證短時間內根本冇其他國家隊有力挑戰佢哋，更遑論家陣喺同組列榜尾、主場對格魯吉亞都只能和波收場嘅芬蘭啦！
芬蘭老牌中場停賽

對於西班牙球迷嚟講，今輪世盃外陣容最大嘅喜訊，莫過於迪保斯基終於肯放棄「廢托」，正正常常用番韋拿擔正，呢位巴塞射手唔單止係「狂牛軍團」入球紀錄嘅保持者，最重要係佢已經連續2場有士哥，終於重拾昔日風采，有韋拿孭飛，想入少粒都難咯！

雖然門神卡斯拿斯因傷冇入選，沙維又有傷在身，好大機會要到下周對法國先落場，但講真，對住芬蘭咁嘅對手，根本唔需要出動呢位「中場大腦」，加上學捷西斯拿華斯話齋，「狂牛」陣中仲有大把好波之人，就好似作為皇馬命脈嘅沙比阿朗素咁，佢嘅傳送質素從來都係世界最頂級，拍住踢到曉飛嘅恩尼斯達，韋拿、柏度洛迪古斯等唔使驚冇供應！咪忘記芬蘭嗰邊仲有經驗最老到嘅魯賓卡山中場艾利文高停賽，睇怕客軍上半場已經要扯定白旗喇。

歐洲區I組
西班牙近戰例炒對手

‧西班牙由2012年開始就未試過輸波。

‧西班牙近8戰有5場至少入3球。

‧芬蘭喺1969年世盃外贏過1次西班牙，之後對賽就未贏過。
「全民皆鋒」場場開大騷

西班牙嘅鋒力喺世界球壇數一數二，皆因佢哋「全民皆鋒」，就算係防守中場沙比阿朗素同後衞佐迪艾巴，都有極強嘅入球能力，難怪佢哋早排頻頻起用「無鋒陣」，近8戰仍然有5場最少入3粒，當中仲有4場數4球或以上，今晚撞啱韋拿回歸，火力肯定更上一層樓，就算入球中位數開到3.5球，1.93倍嘅入球大仍然好穩陣。