英U21霸氣勁羅馬尼亞有難

猪拉多纳

「幼獅兵團」挾7連勝氣勢殺聲震天，新星為搏「阿皮」歡心，主場勢劏羅馬尼亞！國際熱身賽，英格蘭Ｕ21於韋甘比主場迎戰羅馬尼亞Ｕ21，主隊有「紅軍三寶」助陣人腳勁齊，客軍旨在攞經驗等做炮灰，直取讓球主勝！

（now 633及660周五凌晨3時直播）
國際賽7連勝遇弱有計

英軍大國腳一向雷聲大、雨點小，鬥弱旅都周時老鼠拉龜，小國腳反而爭氣，撼弱旅嗰陣能踢出霸氣，自舊年3月起球隊連贏7場國際賽，刷新連勝紀錄，最犀利係一粒都未失過。今晚雖有湯馬士恩斯及勞基梳爾因傷缺陣，但「幼獅」三線都好齊腳，前面有域咸同韋費特沙夏擔正，後面有畢蘭特守龍，中場有佐敦軒達臣、舒維爾同史達寧壓陣，呢班波夾慣夾熟，卡士十足。此外，Ｕ21歐國盃決賽周於今夏舉行，新星為爭位，必落多兩錢肉緊。

羅馬尼亞Ｕ21未能殺入今夏決賽周，故今次點兵多名大將都冇入選，入選球員大多只係得2、3頂喼帽，經驗輸晒，今場作客輸少當贏啦！