特雷斯登主場大科騷

猪拉多纳

今晚賽事比較少，阿King重心推介德乙特雷斯登主場對科隆，要入球大。兩隊各有所求，特軍近期專注喺自己地頭搶分護級，甚至擊敗榜首哈化柏林，絕對唔可以睇小。科隆力爭升班資格，近十三場聯賽不敗，走勢凌厲。雙方都冇得保留，肯定會有一番激鬥，隨時上演入球騷。

（周二凌晨3時15分開賽）
科隆爭升班

對特雷斯登呢類弱隊而言，想搶分往往要靠士氣同鬥志，因此主場球迷打氣聲，成為爭勝重要動力。佢哋歇冬後亦冇令fans失望，近三次主場出擊，取得兩勝一和，包括力挫護級對手辛特侯遜，以及爆冷擊敗一哥哈化柏林，就算今仗遇上前列嘅科隆，亦未驚過。特雷斯登已打起信心，應會主動搶攻，再博取三分。

科隆已經被頭兩位球隊拋離，不過以佢哋近十三場聯賽錄得七勝六和嘅穩定表現，仍然有相當大機會搶到季軍，踢升班附加賽。尤其係今仗對手只係下游球隊特雷斯登，科隆應會更進取求勝，入波並非難事。

荷乙方面，幸運薛達主場對甘堡爾，雙方剛於上周六凌晨比賽完，話咁快又踢，球員未必回到氣，影響攻門質素，建議要入球細。伊高斯主場對精英隊，主隊首席射手侯治高普停賽，攻力大為削弱，讓波有暗湧，寧揀「讓球客勝」。