3月之星韋根發力收「素」

猪拉多纳

護級大戰爆發！今晚英超韋根喺主場迎戰紐卡素，2.1倍主勝抵玩。韋根一向係護級專家，佢哋上季喺3月先發力，一口氣攞夠分數上岸，當中仲試過喺主場擊敗曼聯，成為一時佳話添！呢班波真係好過癮，3月首戰雖然不敵利物浦，但到上周英總就作客炒愛華頓3:0，表現有辦有眼，啱啱先踢完歐霸嘅紐記，邊夠體力同韋根周旋呀？

（有線203及303周一凌晨0:00直播）

從對上兩場波可見，韋根有唔錯嘅攻擊力，對利物浦之所以連蛋都破唔到，好大程度係對家門將連拿有神級表現，救咗幾個必入波。到上仗作客愛華頓，韋根繼續搶攻，中場祖迪高美斯同卡林麥馬拿文頻頻殺入禁區，協助前線嘅干尼，搞到堂堂愛華頓喺主場都要抬3蛋走人。

講開干尼，呢位前利雲特射手突破能力強，仲經常拉開空位畀隊友後上，堪稱係「韋根版美斯」，只要佢哋條防線Keep住上仗嘅集中力，今晚回師主場要全取3分，應該冇問題。
紐卡素集中火力爭歐霸

對家紐卡素依家喺聯賽唔上唔落，所以佢哋都集中火力爭今屆歐霸盃。睇番紐記今季所有作客賽事，加埋只係贏得嗰兩場比賽，可見佢哋離開聖占士主場，戰鬥力大打折扣，再者「喜鵲」幾日前先喺歐霸險勝安治，今晚回唔回得切氣都成問題，點頂得住韋根呀！
張峰來料：韋根（勝）