華歷簡奴疑似留力

猪拉多纳

巴塞上周成功絕地反擊，淘汰AC打入歐聯8強，對於美斯為首嘅一眾巴塞球星嚟講，一場反勝係挽回自信嘅最佳良藥，等如皇馬喺雙殺巴塞後，士氣及團結度達至今季最高點一樣。

持續勇態嘅美斯今晚鬥華歷簡奴相信會繼續披甲，力爭今季第41個聯賽入球，現時佢嘅個人入球數字已經高過當中16支西甲球隊全隊嘅入球數字，今晚隨時會連續18周聯賽入波，將紀錄無限伸延。

華歷簡奴上季仲要為護級而戰，但今季竟然攀上中游位置，表現令人驚喜，尤其係隊長比迪喺左路發揮相當大嘅作用，埋門把握亦佳，個人已取得11個聯賽入球。而且教練柏高又至叻計數，將搶分重點放喺主場同中下游球隊身上，對巴塞、皇馬等強隊就稍為留力，好似主力查維富亞高及卡沙度上周就疑似主動「申請」黃牌，等自己今周停賽，留待下輪主場對馬拉加再搏殺。

下周馬拉加有歐聯8強後顧，定必留力應付，咁樣華歷簡奴便有機可乘，球迷不妨留意。若我嘅推測無錯，今晚巴塞可以輕易取勝兩、三球。

猪拉多纳