AC一肚氣 捉儍約祭旗

猪拉多纳

細個睇波嗰陣，阿哥成日都話意甲好刺激，嗰時仲有個花名叫「小型世界盃」添，可惜時移世易，呢個聯賽已經變成無星又無聲，好彩，隨住巴洛迪利加盟AC，意甲總算有番啲啲生氣，今晚「巴神」領軍喺聖西路迎戰魚腩巴勒莫，小妹撐硬1.8倍「讓主」！

小妹喺上周中見證住「紅黑軍」慘敗畀巴塞，心入面真係有多少唔舒服，首回合領先2球以為形勢大好，點不知次回合輸鑊甘嘅出局，堅慘！冇計啦，鬼叫對手係「地上最強」咩，希望AC眾將收拾心情，化悲憤為力量啦！
巴勒莫易帥 球迷聚集抗議

講真，齋計聯賽的話，AC表現真係堅勁，歇冬後10戰錄得7勝3和，由原本中游位置升到上第3位，雖然落後祖記9分，但咪忘記「老婦人」除咗狀態回落兼要分心歐聯，最重要係兩軍仲有場6分波未踢，只要AC唔好突然走樣，都仲有機會後上封王，始終聖西路威力唔係人咁品，對上7次地頭出擊贏晒之餘，仲要場場最少入2粒，撞啱巴洛迪利上仗復出即有士哥，今鋪重新擔正，即使柏仙尼打柴，鋒力一樣咁可靠。

對家巴勒莫衰到貼地，上仗主場對錫耶納由贏變輸，連續15場聯賽開唔到W，最大鑊係「傻豹」班高層亂晒坑，上個月先請名帥加斯柏連尼回歸救亡，早兩日又失驚無神炒咗佢，用番之前搞到球會一鑊粥嘅辛尼路執教，1季換5次教練，班球員無所適從，難怪日前班「豹粉」喺巴勒莫大本營度聚集抗議啦！而且佢哋有前鋒艾保靴南迪斯、中場艾格巴列圖同守將文度雲尼養傷，今鋪造訪聖西路，聽做AC出氣袋啦！
推介：AC（讓主）

Sherry

曾經有個甲組球員男朋友，回復單身後寄情掟飛鏢運動，偶爾擔任兼職模特兒。近日已重墮愛河，恭喜晒！
微博傳情：請「最愛」去旅行

尋日小妹推晒所有約會，專登走去買定船飛「卜」定房，請爹哋同媽咪去澳門玩餐飽！哈，當我話畀佢哋知嗰陣，兩位「最愛」仲笑到見牙唔見眼添，見到兩老開心，小妹真係覺得好幸福！