車仔扑鍾吔魚生粥

猪拉多纳

「肥賓」玩輪換好易死火

喺足總盃死唔去，歐霸又驚險過關嘅車路士，今晚返嚟英超主場迎戰實力平平嘅韋斯咸，以為可以輕鬆贏番鋪咩？未必！車仔主帥賓尼迪斯鍾意玩輪換，球員道火好難Keep得好，至弊係佢哋近排防線甩漏多，小心最後小勝收場，力奇會冷敲3.65倍「讓球和」。

（有線200及300、廣東體育周一凌晨0:00直播）

今季表現反覆嘅車仔，嚟到近兩個星期，成績就同坐過山車一樣嚇死你。前個星期嘅歐霸盃首回合作客輸畀布加勒斯特星隊0:1；之後到足總盃落後2球戲劇性逼和曼聯2:2，保到個重賽機會；到啱啱上周中喺歐霸盃次回合，又係一度和緊1:1，陷於出局邊緣，換邊後先話連下兩城贏波晉級。

講狀態，車仔肯定唔算好，最慘係「肥賓」又鍾意玩輪換制，好似上仗啱啱重拾射門鞋嘅費托，今晚據聞又會打番後備。頂佢個位嘅丹巴巴亞，上半季喺紐卡素着晒火，但嚟到史丹福橋踢吓抖吓，至今就只係入過4球。至於早排腳風回順嘅中場林柏特，對上個入波係嚟自上月中場足總盃，今晚佢同域陀摩西斯齊齊復任正選，如果有貨交，「肥賓」實在應該去還神。
韋斯咸連續7場有士哥

當然，計實力車仔點都喺韋斯咸之上，加上「錘仔幫」今仗仲會有隊長路蘭、中場祖高爾同前鋒麥克盧保等缺陣，車仔最後全取3分又有乜出奇？不過講到要大炒一場，力奇最擔心係車仔嘅防線，近3場夾埋失咗4球，近排攞番正選位嘅泰利，真係走咗少少樣，門將施治又間中出錯，既然韋斯咸已經連續7場取得入波，火力未至太差，博車仔小勝之餘，2:1波膽都有得諗o架！
韋斯咸作客唔識入波

‧車路士射手費托剛戰取得個人喺2013年第2個入波。

‧韋斯咸與史篤城並列英超客場入波第2少球隊，得9球。

‧車路士近6次主場鬥韋斯咸得5勝1和。
交手連開4次大再追

車仔今晚對住韋斯咸有機會係場入球騷，睇番往績，呢兩班波近4次交手次次都開得出入球大o架！老實講，車仔鋒力一向有保證，「錘仔幫」踢緊風流波，又唔會死守，大家踢得「開放」，1.52倍入球大夠晒穩陣。