囂張致敗謙虛致勝

猪拉多纳

歐聯8強抽完籤，但4月初先至開波，稍後再作分析。從分組賽同16強淘汰賽可以搵到唔少例子，將歐聯同人生哲理相提並論。上屆冠軍車路士同富豪球會曼城分組賽出局，馬拉加爆冷打入8強，再次證明要獲得佳績，唔一定要靠金錢。被拖欠人工嘅馬拉加，一班失意軍人眾志成城，一樣有作為。

巴塞隆拿反勝AC米蘭，說明凡事唔好太武斷同跟紅頂白，而係要客觀、耐性分析球隊實力同潛質。AC根本唔係祖雲達斯級數，贏巴塞一場，唔代表一切，賽前唔少聲音判巴塞死刑，又話佢哋已到末日，呢類意見冇內涵。

至於拜仁慕尼黑16強次回合可勝、可和、可負情況下，投X者真係要忍手，實在太多變數，叫人點賭呀？勉強去買冇着數。曼聯想借淘汰皇馬，為傑斯慶祝上陣一千場，但呢種高調、甚至帶有囂張意味嘅做法，效果往往事與願違，因為多數會激起對手鬥志，所以話做人最緊要謙虛。
皇、巴成功靠苦幹

俗語有云：路遙知馬力、日久見人心，歐聯由外圍賽、附加賽、分組賽到淘汰賽，包含多種元素，球隊需要大師級主帥領軍，並必須做好防守，就算最擅長進攻嘅巴塞同皇馬，踢淘汰賽時都要由前場開始緊迫　防守。另外，現代足球非常講究後備力量同生力軍，踢一場過比賽，或者可以偷雞，但踢聯賽、歐聯需要充裕兵力應付傷患問題。歐聯啟示眾多，篇幅有限，將來再傾。
金句：歐聯啟示錄