倫敦打吡今夜雙響炮

猪拉多纳

今季英超20路大軍中共有6支球隊來自倫敦，形成一個「首都圈小聯賽」，而一季之內就足足有30場倫敦打吡戰。熱刺暫時喺呢個小聯賽中以8戰16分居首，阿仙奴8戰13分居次，車路士就有11分排第3但踢少1場，仍有機會後來居上。今晚熱刺同車路士咁啱齊齊遇上富咸同韋斯咸，構成倫敦打吡戰雙響炮嘅強勁戲碼，呢兩支目前排英超3、4位嘅勁旅，除咗互爭英超季軍，仲要為做「倫敦一哥」而打拚！
車仔殺氣大 勢炒韋斯咸

打吡雙響砲尾場由車路士主場迎戰韋斯咸，車仔連續兩場盃賽打起士氣，密密踢反而打起信心。教頭賓尼迪斯上任後首場敗仗正正係畀「錘仔幫」扑濕，開壞個頭衰到依家，「肥賓」必想大炒對手復仇。韋斯咸今季打吡戰大盤率超過8成，今戰預期多士哥，熱捧大盤！

（有線300及200台周一凌晨零時直播）
士氣返晒嚟 賓帥要報仇

車路士近期兼顧聯賽、足總盃同歐霸盃，連場大戰都搏得幾盡，有朋友擔心班波有疲態，有呢種諗法好正常，不過蘇豪就有另一種睇法，自從賓尼迪斯喺舊年11月上任後，車仔球員真正搏殺賽事一隻手數得晒，去到賽季關鍵時刻班兵先較為肉緊，前仗足總盃劣勢下逼和曼聯，上場歐霸盃換邊後入多兩粒踢走布拉勒斯特星隊，兩戰打番起晒信心同士氣，氣勢足以彌補疲兵問題。

況且車路士擁有龐大軍容，「肥賓」大可施展輪換大法，林柏特同丹巴巴亞等人有望復任正選，輪住踢體力負擔唔算好大。賓尼迪斯上「車」後頭兩場賽和曼城同富咸，第3戰作客韋斯咸半場贏住1粒，諗住可以開齋，點知換邊後畀對手連入3球反輸1比3，即時令「反賓」情緒升溫，賓帥今次梗係有仇報仇啦！

韋斯咸3大中場路蘭、祖高爾同麥克盧保都有微傷，紮住上陣難免會影響中場造波能力，不過，佢哋去到史丹福橋球場預咗捱打，可以踢簡單足球，以1分為目標。
錘仔幫作客 遇強必大敗

「錘仔幫」今季客場14戰入9球，拍住史篤城暫列英超作客最少士哥球隊，但佢哋本季於8場打吡戰場場有波入，當中7場開大盤，今季造訪熱刺及阿仙奴等倫敦勁旅同樣大敗，相信今次亦唔例外。