皇馬弗爆玩殘馬略卡

猪拉多纳

全速啟航6連勝嘅「銀河艦隊」皇家馬德里，今晚喺西甲主場迎戰護級分子馬略卡，賽前消息話佢哋會擺番個最強陣出擊，實行以戰養戰維持近期勇態。以C朗為首嘅鋒線配上正選防線，有攻有守冇得挑剔，今晚想佢哋贏少球都難，讓兩球都好，照捧1.75倍「讓主」！

（now632台周日凌晨3:00直播）

季初輸到甩轆，搞到家陣喺西甲畀「一哥」巴塞拋離13分嘅皇馬，雖然話爭標機會麻麻，但講到底，佢哋肯定唔會想衰到連亞軍都冇埋，特別係依家排第3、落後皇馬1分嘅正係同市宿敵馬體會，試問今晚場波點會唔搏命先？再者，皇馬捱到上月中，先至話終於谷起狀態，近排6連勝先後喺西盃同歐聯過關，包括兩勝宿敵巴塞同作客奧脫福力克曼聯尤其係代表作。主帥莫連奴經驗豐富，當然唔會咁蠢收起主力，撳熄番隊波啲火。
正選防線抖夠復出

上輪聯賽對切爾達畀咗成條防線常規正選休戰，賽前消息指，除咗首席門神卡斯拿斯踏入康復療程尾聲，今仗繼續抖外，包括華拉尼、法比奧干查奧、沙治奧拉莫斯同艾比路亞都會齊齊復任正選。至於傷愈冇耐嘅比比，應該會再次擔正搵番節奏。前線當然會由超級鐵人C朗領軍，唯一會收起，據聞係之後要幫阿根廷踢國際賽周圍飛嘅射手希古恩，但有賓施馬撐住，一樣冇有怕啦！

馬略卡呢邊，話就話兩連勝氣勢唔錯，但目前排喺尾3，實力有幾多都唔使多講啦！雖則話佢哋今仗會有巴西守將柏度基洛美波監刑滿復出，只係睇番佢哋近4次出戰皇馬都係全部輸晒，近兩場仲係分別輸3球同5球，今晚撞正大勇嘅「銀河艦隊」，都係聽做炮灰啦！