皇馬如臨大敵

猪拉多纳

馬略卡變身唔再好恰

今晚西甲「銀河艦隊」又出動，皇家馬德里主場迎戰下游分子馬略卡。今季聯賽一直畀「細佬」馬德里體育會騎住的皇馬，近日終於爬頭升上次席，氣勢如虹，不過馬略卡同樣唔嘢小，連贏兩場後護級重現一線曙光，為了搶分，就算作客巴拿貝球場都會同皇馬鍊過，鬥攻格局，大細中位數3.5球仍捧入球大。

（now 632周日凌晨3時直播）

今季馬體會異軍突起，長踞聯賽第二位，一度有力威脅榜首巴塞，搞到同市一哥皇馬勁冇癮。不過「床單兵團」有點後勁不繼頻頻失分，讓聯賽五連勝的皇馬爬過「細佬」升上次席。教練莫連奴適時作出當頭棒喝，警告下屬唔好得意忘形，話困難時刻依家先開始，佢絕對唔容許球員放鬆或犯錯，否則天王都冇得踢，加上皇馬球員一向在巴拿貝球場比賽唔敢揸流攤，難得咁辛苦先爬過馬體會，面子攸關，唔會再大意跌番落去，眾將必定拚盡。
馬略卡搶分頻得手

然而，馬略卡亦非善男信女，在老帥文沙奴回巢下，近期亦以攻代守豁出去，前仗作客靠補時階段入波擊敗CF格蘭納達，乘住道氣上仗贏埋西維爾，唔單止以色列前鋒希密特重拾射門鞋，連中場艾真度艾法路亦頻有士哥，協助球隊回升到尾三，只差第17位的薩拉戈薩兩分，為了搶分護級，今仗作客皇馬唔會坐以待斃，守將奇雲加西亞好大口氣咁話，馬略卡隨時嚇你一跳，看來雙方會合演一場大龍鳳，就算大細中位數調至3.5球，照捧大盤。