維拉打護級6分波冇揸流

猪拉多纳

英超爭標形勢早已由曼聯甩開晒，但護級就非常激烈，相信三個降班席位離唔開昆士柏流浪、雷丁、韋根、阿士東維拉同修咸頓，今晚維拉主場同昆士柏流浪（QPR）交鋒，對兩隊命運非常關鍵。老實講雙方實力接近，勝負好睇球員臨場把握力，度士對維拉鋒線人腳比較有信心，只要贏出今場「六分波」，好大機會上岸，維拉小讓平半要上盤。

（有線302及202台周六晚11時直播）

維拉近三仗一勝二負，但要留意兩場敗仗對手係阿仙奴同曼城，最終都係僅輸一球，雖敗不辱。其實維拉呢班波質素唔差，鋒線上嘅賓迪基同艾邦拉荷屬於英超上乘進攻好手，兩人上仗護級大戰各建一功擊敗雷丁。雷丁該仗亦有唔少攻勢，但都失之交臂，所以把握力成為勝負分野。只要呢兩位射手冇傷冇病，維拉護級前景仍樂觀，今場正係佢哋逃生關鍵之戰，鬥志肯定高，有地利之助點都睇高一線。
QPR受壓隨時爆煲

QPR雖然兩連勝，但只係贏下游球隊修咸頓同新特蘭，過程仲好艱辛，就算佢哋攞足6分，但目前仲排包尾，所承受嘅壓力愈來愈大。壓力有時係爭勝動力，但亦容易令人犯錯，尤其是作客比賽，一旦先失波隨時方寸大亂，QPR今仗失分風險甚高，受讓都博唔過。