曼聯一肚火炒爆雷丁

猪拉多纳

曼聯喺歐聯畀皇馬踢出局，好多人都話輸得唔抵，又批評球證判決不公。不過點講都好啦，曼聯於歐聯出局已成為事實，倒不如踢好聯賽仲實際。今晚曼聯就會喺主場對戰雷丁，依家曼聯會以英超為最大目標，對住雷丁肯定有殺冇賠，話就話雷丁要爭分數護級，但今次嘅對手係爭標要角，雷丁攞分難度極高。鬼Sir相信曼聯今場可以大勝，曼聯讓兩球「讓球主勝」及中位數調升至3.5球嘅大盤可一併兼顧。

（有線300及200台周日凌晨1時30分直播）
雷丁敗筆換領隊

上個月兩隊曾經喺英格蘭足總盃碰頭，當時雷丁作客只以一比二僅敗；不過大家都知道足總盃同英超性質好唔同，今次雷丁未必頂得住。其實雷丁已經連輸五場，走勢可謂衰到貼地，除非球隊有好大進步，否則今場都係凶多吉少。

唔少球迷都話雷丁炒咗領隊麥達莫係一個變數，可能會為球隊帶嚟新鮮感，但鬼Sir認為喺季尾炒領隊未必係件好事，要知道麥達莫睇住班波已有一段時間，邊度好邊度壞佢一清二楚，並非一個看守領隊可取代到佢嘅位置。

曼聯喺歐聯輸波出局，之後喺足總盃又被車路士逼和，領隊費格遜話係球員疲累所致。但經過小休期之後，曼聯應可回復體力，以最佳狀態迎接今場比賽。前鋒尹佩斯及朗尼都好想入波，主場交出「士哥」都好正路。今場屬強弱懸殊對賽，曼聯肯定佔盡上風，大勝機高。