史雲斯大把本錢阿仙奴惡踢

猪拉多纳

目前在積分榜排第5的阿仙奴，距離第4位的車路士已有5分差距，如要保5趕4，今晚作客同為「技術流」的史雲斯再無失分空間，故必會全力搶攻爭勝；只是史雲斯捧走英聯盃後已無欲無求，隨時放開懷抱享受比賽，加上有「槍手剋星」米捷壓陣，無壓力下會同兵工廠鬥攻，因此今仗唔慌冇士哥，入球大更值博。

（有線201及301台周六晚11時直播）

上周中阿仙奴於歐聯16強贏拜仁2比0，儘管未能收復失地，但該隊成為繼93年諾域治後另一支作客擊敗呢支德甲班霸的英超球隊，總算光榮出局，對大軍士氣提升唔少。依家阿仙奴可專心番聯賽，由於佢地只係領先利物浦、愛華頓2分，一唔小心隨時連歐霸都冇得踢，因此就算有韋舒亞、沙格拿等因傷倦勤，但以禾確特、基奧特、辛迪卡索拉為首的強大火力，史雲斯後防想唔失波都幾難。
米捷掛帥 槍手後防有難

史雲斯領隊米高盧特立賽前話阿仙奴今仗壓力比佢哋大，暗示「黑天鵝」奪得英聯盃同鎖定歐霸資格後，依家可以踢吓風流波，毫無心理包袱之下有本錢同兵工廠鬥攻。

從今季3次交手所見，同樣以技術出眾見稱的史雲斯，其反擊速度很快，西班牙攻擊中場米捷更3度破門，堪稱「槍手剋星」，今仗勢必再令客軍守將吃盡苦頭，既然雙方火力有番咁上下，今仗入波唔會少，捧大盤啱數。