5哥爭奪戰 3英打崩頭

猪拉多纳

歐霸盃尾班車 剩番Last一個位

英超歐洲賽席位競爭空前激烈，除咗前四位歐聯席位爭餐死，連歐霸盃入場券都爭得好激烈，足總盃同聯賽盃代表各佔一席，餘下一張入場券會留畀英超5哥。睇番目前形勢，第5至7位阿仙奴、愛華頓同利物浦只有兩分之差，餘下每戰都要搏命，實會瞓身搶分，避免下季冇得現身歐洲賽事咁失禮！
愛華頓專剋曼城「讓球主勝」好路

學Peter話齋，英超富豪球會曼城衞冕只剩兩個機會，渺茫機會同冇機會，佢哋被曼聯甩開12分，今輪作客作客剋星愛華頓又缺少王牌射手阿古路，要贏波難上加難。「拖肥糖」主帥莫耶斯近季專門幫曼聯同鄉費格遜對付死敵曼城，今次一樣唔會手軟，揀「讓球主勝」！

（有線200及300台周六晚8時45分直播）
近7次鬥拖肥糖僅1勝

英超尚餘10周，真正進入最後直路，榜首曼聯以12分優勢遙遙領先，曼城想重演後上季後上奪冠美夢只有寄望奇迹，今輪佢哋重臨凶地葛迪遜公園球場再現失分危機，佢哋對上3次作客愛華頓都擺低晒3分，上季畀曼聯舊將吉遜一箭定江山搞掂，真係衰開有條路。翻查對賽往績，曼城近7次鬥愛華頓只贏1次，其餘6戰錄得1和5負，首循環主場出擊都只能靠12碼逼和對手，今次冇埋射手阿古路，形勢唔樂觀。

查實愛華頓今戰後防唔齊腳，門將侯活養傷，改由後備門將真梅卡把關，防線重心菲臘積基爾卡亦唔踢得，料由希汀加拍住迪斯甸扼守中路，兩個變動當然令人冇咁放心，但「拖肥糖」上季主場對曼城同樣天殘地缺，最後咪一樣照贏！
足總盃出局 要打翻身仗

曼城除阿古路缺陣外，傷兵名單仲有馬爾干、魯迪維爾、泰維斯、高柏尼同拿斯尼，因此未必排到最強陣容出擊。愛華頓剛於足總盃主場對韋根淨吞3蛋，今戰決心反彈，佢哋前線有費蘭尼幫謝拉域開路，有力炸散敵軍防線，「讓球主勝」捧得過。