馬拉加「+1」着數波

猪拉多纳

主場龍咁威 0:1有價講

今晚歐聯16強次回合，馬拉加返主場迎戰波圖，首回合馬拉加作客僅輸0比1，證明防守頂得兩嘴，今仗若贏番1比0便重新嚟過，因此唔會急攻。對手波圖於歐聯經驗豐富，加上首回合有一球領先優勢，作客會踢得小心翼翼，馬拉加主場有得受讓咁筍，「讓球主勝」咪錯過。

（有線62及202台周四凌晨3時45分直播）

睇番首回合戰情，波圖全場攻到馬拉加氣咳，最終只係靠中場摩天奴疑似越位入波小勝1比0，側面反映出馬軍以迪米捷利斯同維列頓為首的防線，演出非常穩健，前者係2010年拜仁殺入歐聯決賽的重要一員，教頭比歷連尼更帶領維拉利爾入過8強同4強，深明去到淘汰賽階段，一個入波都會出現好多變數，就算依家落後緊都唔緊要，若今場贏番1比0便重新嚟過，所以馬拉加唔會太過冒進。
波圖領先唔同你急

事實上，馬拉加於主場表現sharp醒，今季喺自己地頭出戰21場波，只係輸過5仗，當中仲贏過皇家馬德里、AC米蘭及辛尼特等勁旅，真係唔講得笑。

葡超班霸波圖係歐聯常客，經驗唔使懷疑，首回合贏波之餘，最重要係冇失作客入球，今仗一定穩陣行先，睇定嚟食唔會貿然搶攻。睇番波圖近6次造訪西班牙球隊，共錄得3勝2和1負，戰績都算理想，如果佢哋今場立心防守，肯定會令等待反擊機會嘅馬拉加冇啖好食，戰情隨時變得膠着。

由於波圖今仗和波都掂，唔會同你急，因此「讓球主客和」馬拉加受讓非常着數，一於捧「讓球主勝」！另外由於雙方偏向保守，可以揀埋入球細。
出線條件

馬拉加晉級

‧淨勝兩球或以上

‧贏1:0，加時分勝負

波圖晉級

‧勝或和

‧以一球差距落敗，但取得作客入球

‧輸0:1，加時分勝負