《巴塞反擊戰》魯營開Show!

猪拉多纳

4箭頭誓劏AC

「地上最強」反擊戰爆發！歐聯16強重頭大戰巴塞隆拿惡鬥AC米蘭，首回合爆出「紅黑軍」以2:0力挫「地上最強」嘅驚人戰果，雖然喪師聖西路，但今晚巴塞返到魯營踢次回合就唔同講法。論牌面，巴塞始終技高一籌，據聞呢支西甲班霸密謀用4前鋒陣式殺敵，若果屬實的話，小弟就更相信美斯可以將不可能變成可能，熱捧1.6倍「讓主」！

（有線61、64、201及203、中央5台周三凌晨3:45直播）

巴塞首回合輸0:2搞到一地眼鏡碎，如果唔想靠加時或互射12碼晉級，佢哋今場要坐底入3粒兼唔失波先掂，必定要盡地一煲狂攻o架喇！雖然「地上最強」近期喺西甲及西盃連輸2鋪畀皇馬，士氣陷入低點，助教勞拉嘅能力亦備受質疑，不過佢哋始終係巴塞，手上又有個球王叫美斯，試問有邊個敢睇死佢哋呀？
控球率極高3後防都唔驚

有傳巴塞近期積極研究對策，包括可能喺今場排出3-3-4嘅強攻陣式，韋拿、美斯、阿歷斯山齊士同丹尼爾四把尖刀，將會全方位進襲AC米蘭大門，阿歷斯山齊士啱啱喺聯賽仲大踢爭氣波添！換轉係其他隊咁排陣可能好危險，不過巴塞向來控球率極高，就算打3後防陣式都OK，更何況佢哋呢場要贏嘅決心唔係人咁品呢！
AC巴神 柏仙尼齊齊做觀眾

AC米蘭喺首回合嘅表現當然嚇得吓人啦，不過今晚作客嚟到魯營，嗰種高壓就絕對唔係外人可以明白。況且佢哋若果抱住「守住兩球波」嘅心態去踢，表現就肯定唔夠首回合咁放。最重要係AC神箭巴洛迪利唔符合上陣資格，柏仙尼又右腳輕微骨裂肯定唔踢得，雖然奇雲保定同麥薩斯可以克服傷患趕及復出，但消息話AC米蘭會排出死守陣式，今晚消極面對巴塞狂攻，隨時爆煲都似！

首回合：巴客負0:2
巴塞搶攻博半場大

為咗絕地反擊，可以想像巴塞今場一定盡快爭取入球，AC亦會把握機會打反擊，預計上半場節奏明快，容易出現入球。翻查紀錄，巴塞近4次喺歐聯主場對「紅黑軍團」，當中有3次踢咗半場已經出現2球入球，1.97倍「半場大」抵玩。
巴塞主場例有入波

‧巴塞連續9場主場有波入。

‧巴塞近4次歐聯主場對AC不敗。

‧AC連續12場未輸過，近4場只失1球。
巴塞反勝劇本5大元素

1/還原基本：踢番巴塞近年雄霸球壇嘅風格──進攻、控球、逼搶。

2/兩閘進攻：丹尼爾同佐迪艾巴全力支援美斯，為佢製造機會。

3/尋找空位：利用沙維手術刀式傳球，喺AC米蘭嚴密布防中搵出空位。

4/球王美斯：美斯表現嘅好壞直接影響巴塞勝算。

5/幸運之神：巴塞要踢出真我、重拾尊嚴，其他就交由命運去決定。