般尼專打「老虎」信得過

猪拉多纳

侯城要爭直接升班，般尼又何嘗唔係要爭附加賽資格先？呢兩隊波今晚喺英冠獨腳戲正面交鋒，般尼出名係「老虎剋星」，陣營亦都傷疲盡起，對住近況飄忽嘅侯城可以秤先，主勝有成2.48倍梗係博得過啦！（廣東體育周二凌晨3:45直播）
近7次對侯城全勝

般尼目前落後第6位嘅森林9分，後衞捷比亞尋日雄心壯志咁話仲有10輪聯賽，要後來居上搶番個升班附加賽資格仲未絕望，鬥志好到不得了。係，般尼近況係曳，近8場聯賽有7場失分，但係翼鋒華萊士、馬恩尼、守將米高杜夫同賓美爾都已經復操，齊晒章今晚有本錢同侯城鍊過。

綽號「老虎」嘅侯城視直接升班為目標，但有留意開佢哋嘅球迷都知呢班波係幾咁飄忽，可以大勝伯明翰5:2，轉頭輸番畀水晶宮2:4，近3場波足足失咗10球，條防線豆腐成咁，隨時畀連續兩場有「士哥」嘅般尼神射手查理柯士甸有機可乘。最重要係般尼一直剋住呢隻「老虎」，對上7次同侯城交手都贏晒，咁好路冇理由唔追o架！