帕爾馬拖連奴死火冇攻「細」

猪拉多纳

以前細個陪屋企人睇意甲，成日聽到阿哥話帕爾馬嘅基斯普同華朗點勁點勁，正所謂先入為主，時至今日，小妹都仲有留意帕爾馬嘅消息㗎，可惜呢班波近排狀態真係麻麻哋，今晚佢哋喺主場迎戰「大傷鋒」嘅拖連奴，好大機會係悶戰一場，咁嘅環境，梗係捧1.62倍入球細啦！

連埋上仗作客以0:1不敵森多利亞，帕爾馬已經連續8戰不勝，狀態差到得人驚。講到底，佢哋到家陣都要靠過氣射手阿馬利擔大旗，早排佢傷咗，頂上嘅小將比亞比安尼同尼高拿辛桑尼又交唔到貨，5場波加埋先入得嗰兩粒，咁梗係贏唔到波啦！最慘帕爾馬今晚仲有進攻中場馬列加養傷，想佢哋突然一洗頹風喪入波，難啲咯！
拖連奴4大殺手唔踢得

對家拖連奴之前係威係勢，一度錄得7場不敗，嗰陣佢哋位會長仲牙斬斬，話要挑戰歐洲賽添，正所謂路遙知馬力，自從上月中拖連奴輸畀烏甸尼斯後就見晒底，近5戰僅1勝之餘，仲有3場食白果，本身鋒力已經弱過藥煲㗎喇，最大鑊係今晚佢哋有巴西箭頭莊拿泰斯打柴，另外3件前鋒阿利斯奧施斯、艾保迪奧普同馬治奧尼利又齊齊停賽，4大殺手唔踢得，不如疊埋心水死守好過啦！
Sherry 推介：帕爾馬入球細

地獄式減肥迎夏日

弊啦弊啦，呢幾日天氣開始轉熱，夏天就嚟到喇，經過之前冬天假期一輪暴飲暴食，小妹好似肥咗唔少，由今日起，小妹要進行地獄式減肥，各方好友，有咩酒局甚至乎BBQ都唔使預我喇，我要好似以前咁弗，着番短褲同背心呀！
Sherry

曾經有個甲組球員男朋友，回復單身後寄情掟飛鏢運動，偶爾擔任兼職模特兒。近日已重墮愛河，恭喜晒！