史篤城受讓拆紐

猪拉多纳

今晚英超頭場紐卡素主場對史篤城，「喜鵲」經過一輪搶分後，護級壓力已大為紓減，依家矛頭直指歐霸，嚟緊周中對安治先係最重要，加上後防領袖兼隊長高洛仙尼因傷倦勤，難頂史篤城幾支大杉的高空轟炸，「讓球客勝」值得捧場。

（有線301及201台周日晚11時直播）

唔計低組別的聯賽冠軍，紐卡素上一次奪得頂級聯賽錦標已經係1927年，自1969年奪得歐霸前身的國際城市博覽會盃後，「喜鵲」再未嘗冠軍滋味，因此球隊上下恨捧盃恨到發燒，難得今屆於歐霸殺入16強，首回合作客更悶和有伊度奧壓陣的俄超富豪球隊安治，嚟緊周中次回合一定搏盡爭出線，領隊柏杜話自己依家留住幸運鬍鬚，並揚言若進身8強先至會剃鬚，對歐霸的重視程度可見一斑，今仗對史篤城唔會太上心。
紐卡素心繫歐霸盃

況且紐卡素亦傷兵滿營，包括高洛仙尼、告魯爾、賴恩泰萊、賓艾化等，其中前者傷勢嚴重，短期內難望復出，防線存有隱憂。史篤城一向靠高Q大棍搵食，雖然今仗有德國中堅賀夫停賽，但堅韋尼鍾斯、高治、約拿芬禾達斯、梳爾哥斯均屬擅頂之人，面對冇咗後防領袖兼頂得之人高洛仙尼坐鎮、心繫歐霸的「喜鵲」，淨係高空波一瓣都恰死對手，史軍有得受讓咁筍，「讓球客勝」真係有買趁早。
佩利斯夠雷︰鬧球員不如鬧我

史篤城上周主場○比一不敵韋斯咸，主場球迷賽後罕有地向主隊喝倒采，領隊佩利斯就將罪名攬上身，認為球隊已經盡咗力，如果球迷仲有咩不滿就發洩喺佢身上，唔好攞球員做出氣袋。

史篤城對上八場聯賽只得一勝一和六負，雖然目前距離降班區域仲有九至十分，不過如果再唔振作分分鐘被拖落水。佩利斯表示好明白球迷對球隊表現好失望，不過佢話球迷唔應該怪責球員，因為球隊成績唔好，自己應負最大責任：「我喺呢支球隊已經六、七年，最初球迷希望攞到好成績，最終我哋做到了，到呢一刻球迷可能覺得發展停滯不前，所以希望求變，達唔到佢哋期望係領隊責任。」不過佩利斯一向同球會高層關係好好，所以就算球迷點噓佢，相信都唔會動搖佢嘅地位。