紅魔燒車洩憤

猪拉多纳

老費含冤「御用球證」韋比錫番

韋比專益曼聯

曼聯剛過去周中畀張爭議紅牌斷送三冠王美夢，費Sir賽後大搞無聲抗議，可見佢老人家嬲到爆晒燈，呢種情況確實相當罕見。費爵爺要排解不快情緒，最好梗係建築喺敵人痛苦之上啦！環顧成個英超，除死敵曼城教頭文仙尼外，費Sir至憎嗰個一定係賓尼迪斯。「肥賓」帶領利物浦時期吓吓窒住晒，老費懷恨在心，依家賓帥喺車路士成過街老鼠，佢老人家梗係想喺足總盃踢走車仔送「肥賓」一程啦！

紅魔鬼射手朗尼喺歐聯對皇馬時被貶後備，英倫傳媒狂炒佢季尾會被賣走消息，費Sir馬上現身澄清冇咁嘅事，無論傳聞係真係假都好，佢兩師徒都要繼續做埋台戲，齊齊穩定軍心。日本中場香川真司喺歐聯都係做後備，今戰有機會同朗尼雙雙復任正選，佢哋兩個早前喺大勝諾域治一役眉來眼去勁合拍，大軍仲有個「車仔殺手」查維亞靴南迪斯幫手，仲要比車路士有多兩日休息時間，抖夠重新出發，加上今場由紅魔「御用球證」韋比主吹，呢個球證出晒名係紅魔粉絲，過去五季曼聯主場由佢執法九戰全勝，加上好多益曼聯嘅爭議性判決，有埋呢個福星幫手，紅魔爭勝條件四正。
奧脫福剋車仔

車路士現時氣氛更壞，大軍上周中喺歐霸盃作客不敵羅馬尼亞布加勒斯特星隊，「廢托」費蘭度托利斯人如其名形同虛設，連夏薩特同桑馬達等中場重心都冇料到！車路士喺歐霸盃對住次級球隊都束手無策，反觀曼聯上場喺歐聯巔峰對決鬥皇馬打少個仍有力反攻，顯示曼、車目前水平已經愈拉愈遠，即使車仔有番射手丹巴巴亞攻堅亦幫唔到幾多。

自從莫連奴07年落「車」後，曼聯喺奧脫福對住車路士唔再畀對手食住，對上六次主場砌車贏五場，包括今季喺聯賽3比1輕取對手，當時半場已經入三球鎖定勝局，今戰都可再追主勝。另外，兩軍近期交手經常上演入球騷，近十次對戰九場開大，可兼顧埋大盤。