爭盃幫莫耶斯送行 愛華頓齊心炒韋根

猪拉多纳

今晚英格蘭足總盃8強有愛華頓主場撲擊韋根，雖然英總出晒名係爆冷溫床，不過「張峰」相信實力較強嘅愛華頓可以藉主場之利炒起對手，2.1倍「讓主」係我嘅心水之選！

（now633及660台周六晚8:45直播）
韋根分心英超護級

早前「拖肥糖」領隊莫耶斯季尾離隊嘅消息一出，球員即刻表態話希望莫帥留低，可見莫耶斯嘅地位係幾咁重要，今季好可能係莫帥最後一季帶隊，眾將當然想捧番隻盃幫佢送行啦！

事實上，愛華頓喺09年就殺過入英總決賽，最終以1球僅負車路士，事隔4年，愛華頓又難得入到8強，當然會盡地一煲爭盃啦！查實愛華頓嘅主場威力一向強勁，近4次地頭出戰豪取3勝1和入11球，有費蘭尼加埋入楔力強嘅奧士文同米拿拉斯，要撕破韋根防線話咁易。

韋根喺前3圈都遇着低組別球隊，入到8強只係好彩，睇埋佢哋上周英超吞利物浦4蛋，就知呢班波條防線勁多漏洞，更何況護級先係韋根首要任務，今晚作客眾志成城嘅「拖肥糖」，可以話係九死一生。
英總賽制

今輪為英格蘭足總盃8強賽事，打成平手需擇日重賽。