曼城超「班」-2照撐！

猪拉多纳

「野獸」孭飛 捉英冠仔祭旗

「億萬大軍」曼城今晚喺英總8強主場對英冠仔班士利，文仙尼同眾將為保飯碗肯定搏，撞啱泰維斯回勇擔正，難怪足智彩個「讓球主客和」開到-2咁辣咁有信心啦，唔使諗咁多，一於照捧曼城1.85倍「讓主」！

（now635台及廣東體育周日凌晨1:30直播）

唔計季初意義唔大嘅社區盾，曼城今季唯一嘅捧盃希望，好可能就只得番呢隻足總盃。睇番8強抽籤，宿敵曼聯抽中聽晚撼車仔，兩隊只能活一隊已經少咗個勁敵，其餘無論邊兩隊入4強，睇牌面一樣畀唔到威脅曼城，「藍月亮」難得抽到好籤，今晚對住次一級嘅班士利，梗係要大勝一場壯吓聲威啦！
泰仔「停牌駕駛」或踎半年

再者，「藍月亮」狀態的確唔差，上圈英總炒列斯聯4蛋，之後返英超又取得2連勝，當中仲包括2:0擊倒車仔一仗添，唔嘢小o架！雖然佢哋今晚有前鋒阿古路同中場魯迪維爾因傷缺陣，好彩隊長高柏尼可以復出穩住條防線，而且「野獸」泰維斯雖然喺尋晚「停牌駕駛」兼超速被捕，隨時要坐半年監，好在泰仔隨即獲釋，今晚可如期上陣，唔理場外發生咩事都好，難得佢位「勁敵」阿古路打柴，泰仔今鋪擔正做男主角，梗係要入多幾粒做番齣好戲啦！
班士利連英冠都踢唔掂

對家班士利家陣喺英冠排緊尾3，實力有幾「勁」唔使多講。睇番佢哋個陣容，中場重心奇雲艾度曉係曼城舊將，想當年耶耶托尼來投，艾度曉冇碇企先焗住走人，呢件尼日利亞中場冇嬲不特止，仲話會喺賽後搵「耶耶」交換波衫添，成個小Fans對住偶像咁款，邊有運行吖？係，雖然班士利中場史提芬戴臣有望帶傷復出，但佢抖咗成9場咁耐，狀態成疑，而且班士利仲要分心英冠護級，邊有心情阻曼城發達呀？
曼城英總鬥班士利全勝

‧兩軍歷來交手32次，曼城得16勝10和6負。

‧班士利喺足總盃2鬥曼城均落敗。

‧目前排英超第2位嘅曼城，總排名較班士利高40位。
耶耶 施華後上最拿「首」

今場波擺明係攻防戰，曼城一對箭頭勢必成為班士利防線緊盯對象，如果想玩首名入球，大家可以向兩個中場耶耶托尼同大衞施華埋手。事關佢哋射術唔曳，加上後上攻門唔易防範，耶耶今季聯賽5個入波就有2個係「首球」，施華仔3個入波亦有2次係先開紀錄，博得過o架！