巴塞借細反彈

猪拉多纳

美斯博物館開張 拉科到賀

今晚西甲上演首尾之戰，一哥巴塞隆拿主場迎戰包尾大幡拉科魯尼亞。睇落強弱懸殊，不過巴塞連輸兩場畀死敵皇馬，士氣直插谷底，嚟緊周中歐聯仲要硬撼AC米蘭，眾將難免會分心，今仗唔會搏盡；拉科近期守得兩嘴，未必大敗，大細中位數調至3.5球，細盤有計。

（now 632周日凌晨3時直播）

巴塞近況有幾曳唔使多講，尤其係上仗作客對住半力應戰嘅皇馬都輸埋，嚴重打擊球員信心，賽後門將域陀華迪斯追住球證係咁爆粗，反映出該隊心態失衡，愈急躁就愈贏唔到，就算幾勁都冇用。況且下周中有場歐聯16強對AC嘅生死戰，首回合以0比2敗陣，巴塞必須淨勝三粒先可晉級，由於此役實在太重要，相信球員已將注意力放晒喺個場波度，況且聯賽仲有失分空間，看守教練勞拉對拉科收起部分主力亦唔出奇。
拉科易帥改善防守

巴塞今仗有沙維同域陀華迪斯因傷停缺陣，有媒體批評勞帥唔識輪換用殘沙維，搞到佢負荷唔嚟傷上加傷，冇咗呢位中場核心鋪橋搭路，美斯隨時踢到冇影。拉科今季兩度易帥，喺新教頭費蘭度華斯基斯接手後，頭炮雖被西維爾大炒，但前仗力戰到尾段先畀皇馬反勝，上仗亦成功守和華歷簡奴，近兩場只失兩粒，防線表現續有改善，對住極度唔順兼有後顧之憂嘅巴塞，死守之下未必大敗，細盤有2.15倍值博。

近日巴塞隆拿市多咗個新景點，就係美斯博物館，展期去到4月7日。呢個博物館除咗展出美斯嘅4座金球獎、歐洲金靴獎及各項冠軍獎牌外，仲會有佢出道以來着過嘅所有波砵，包括新款紅白色F50戰靴，據報呢款波砵美斯有份參與設計，並且會喺對拉科之役穿上應戰。