魯爾區打吡支持多蒙特

猪拉多纳

呢個禮拜周中歐洲賽成日要開夜車，所以我豬Wen前日朝早一講完場歐霸之後，就即刻搭早機飛咗去泰國鬆一鬆。嘻嘻，呢個周末就留喺酒店房聽「cup本cup」泰語評述嘅足球啦！

呢個禮拜德甲重頭大戰唔使多講，梗係一年兩次嘅魯爾區打吡大戰：史浩克04火併多蒙特啦！多蒙特啱啱喺周中歐聯憑菲臘比辛坦拿、馬里奧葛斯及巴拉斯塞高斯基各建一功，以三比○輕取烏克蘭勁旅薩克達，總比數五比二淘汰對手，自1998年後再次進身歐聯八強，一吐上屆喺分組賽出局嘅烏氣！

多蒙特踢聯賽冇歐聯咁醒，暫時落後榜首拜仁慕尼黑十七分，今季爭標無望喇！今晚作客大戰史浩克04，中堅曉姆斯因傷料繼續缺陣，但中前場嘅馬高列奧斯及馬里奧葛斯等等，依然會支援狀態大勇嘅羅拔利雲度夫斯基，攻力無問題吖！

主場嘅史浩克一樣今季喺聯賽表現失色，但喺歐洲戰場表現就相當唔錯，嚟緊周三凌晨佢哋歐聯要喺主場對加拉塔沙雷，首回合作客土耳其逼和對手兼攞到重要嘅作客入球，有利出線。雖然今晚對多蒙特呢場係傳統大戰，一定無情講，但史浩克畢竟有歐聯後顧，或多或少都要避重就輕一下。況且近三季多蒙特作客史浩克都未輸過，取得兩勝一和好成績，今晚「蜜蜂兵團」作客小讓平半絕對值得捧場啦！

（有線61台周六晚10時30分直播）
WENDY推介：多蒙特 上盤