噴射機主W快「珀板」

猪拉多纳

唔經唔覺，澳職常規賽已經踏入尾聲，今午就有場獨腳戲，由紐卡素噴射機喺主場迎戰珀斯光輝，光輝今季作客戰績差到冇人有，期望佢哋面對主場表現勁掂嘅噴射機可保不敗未免太大想頭喇，當然捧2.45倍主勝啦！

（有線64周五下午4:30直播）

紐卡素噴射機上場雖則吞咗墨爾本勝利5隻光蛋，但小妹對回師主場嘅佢哋仍然充滿信心o架！皆因噴射機近6次喺自己地頭出戰都能保持不敗，34歲老將布歷捷斯重出江湖仍然有貨交，佢上場輪休後體力應恢復得七七八八，就算今仗有希斯基受咗傷唔踢得，火力方面相信唔成問題。至於後防線雖有泰萊列根停賽，不過干洛卓文啱啱趕得切復出頂替，面對「作客蟲」光輝，相信可以贏波收復失地。
光輝作客火力排澳職包尾

珀斯光輝賽前排喺聯賽榜尾二，歸根究柢都係因為佢哋作客成績太差，今季11場只贏過1場咁大把，仲要只入得嗰5球，外訪嘅攻擊力位列澳職倒數第1，可以話攻不銳守不穩，就算隊長積及般斯克服背傷復出，但呢位中場抖咗個幾月，家陣狀態成疑未必幫到手，想喺噴射機身上搶分，實在難過登天。