老婦人副選孭飛博「細」好「路」

猪拉多纳

3球喺手有乜法子唔悶戰

今晚繼續有歐聯16強次回合激戰，「老婦人」祖雲達斯會喺主場迎戰些路迪。首回合佢哋作客反客為主，輕描淡寫派咗3隻光蛋畀些路迪，晉級8強高唱入雲，就連些路迪領隊連儂，賽後亦承認要喺次回合收復失地嘅可能性微乎其微。今場比賽似係例行公事，隨時變成悶戰一場，向2.1倍入球細埋手就最好不過。

（有線62及202周四凌晨3:45直播）
些路迪冇得追領隊投降

祖雲達斯近況只係一般，近3場勝和負各一，不過首回合揸住3個作客入球喺手，有消息指教練干地會畀班主力抖吓，除咗收起列治史迪拿、馬治斯奧同維達爾幾位孭簿球員外，就連傷愈冇耐兼坐完波監嘅基亞連尼亦冇份落場。但對住破門乏力嘅些路迪，伊斯拿、保羅普巴同馬田卡沙利斯呢班副選難得有正選落場打，肯定會踢得好好睇睇力保清白之身，今場只要中場控制節奏做得好，晉級8強應該手到拿來。

首回合落後3球嘅些路迪，作客去到都靈球場只係盡吓人事，始終落後差距太大，要喺經驗豐富嘅祖記身上絕地反擊，似乎幾不切實際。其實對於成功突破分組賽嘅些路迪嚟講，今晚避免再大敗一場相信已經有晒交代，既然依家喺蘇超一枝獨秀，大可以全力出擊，盡情享受吓今屆餘下嘅歐聯時光。
祖記歐聯主場少失波

‧些路迪於歐聯分組賽3場作客全部開出「半和」。

‧祖記於歐聯分組賽不敗晉級，3戰主場只失1球。

‧祖雲達斯今季意甲14次主場出戰，有9場保持清白之身。

首回合：祖客勝3:0