皇馬齊心降魔！

猪拉多纳

雙殺巴塞着晒火

曼聯對皇馬嘅歐聯16強次回合，激爆上演！首回合紅魔作客和皇馬1:1，形勢表面唔差，但小弟認為踢呢啲超級大戰，球員嘅士氣最重要，皇馬雙殺巴塞，內訌問題搞掂之餘仲咁弗，我撐2.07倍客W！（有線61、64、201及203、中央5台周三凌晨3:45直播）
莊尼伊雲斯冇跟大隊練波

紅魔喺英超雖然贏到開巷，但佢哋喺聯賽嘅對手唔太強，無形中削弱球員喺「強強對碰」嘅能力同狀態。事實上，自從歐聯首回合後，曼聯近排就只係對雷丁、昆士柏流浪同諾域治呢啲護級弱旅，反而皇馬就要鬥巴塞隆拿，仲要兩次都贏晒添，班球員一早慣晒喺「高壓環境」比賽，無論士氣、心態同狀態都比曼聯稍勝一籌。

查實對曼聯嚟講，首回合1:1嘅戰果唔係特別着數，佢哋今場喺主場應該穩守定進攻，反而會十五十六，如果以為死守唔失波就可以晉級，以紅魔今季條豆腐防線，分分鐘鑄成大錯！何況尋日最後1課練波，莊尼伊雲斯只係自己一個响旁邊郁吓，唔知係咪有事。再講，上仗如果唔係門神迪基亞上晒身，又點保得住不敗呀？「費蛇」今晚再單靠呢把「神經刀」，真係要自求多福喇！

相反，皇馬喺西甲衞冕無望，目標轉為攻盃賽，上星期仲喺西盃絕地反擊，搞掂巴塞殺入決賽，佢哋上周作客魯營尚且贏得清脆，今鋪征戰奧脫福，又點會驚先？皇馬除咗有倒戈嘅C朗壓陣，仲有精神領袖、新傷初愈嘅卡斯拿斯入選大軍名單，證明佢同莫帥已經無晒心病，「卡隊長」落唔落場都好，至少證明「銀河艦隊」家陣夠晒團結，唔使諗咁多，一於撐皇馬啦！

首回合：曼客和1:1

頂占筍盤：皇馬（客勝）
莫帥艦隊作客少輸波

‧曼聯喺奧脫福錄得10連勝，共入26球失8球。

‧C朗及賓施馬包辦皇馬喺歐聯分組賽作客嘅所有入球。

‧莫連奴入主皇馬後，15次作客歐聯只曾2敗。
主帥鬥穩陣半細值博

「魔皇戰」首回合開波半個鐘已經踢成1:1，不過之後就再冇交收，睇得出費格遜同莫連奴都係以穩陣行先，兩軍今晚上演次回合生死戰，上半場肯定會睇定啲先再作打算，1.59倍「半細」值得一試。