文帥下最後通牒 曼城發火劏維拉

猪拉多纳

衞冕夢瀕臨幻滅

曼城家陣已被踢多場嘅榜首曼聯拋離15分，再唔醒定啲，衞冕夢想隨時幻滅，為咗今晚喺英超作客阿士東維拉攞到3分，領隊文仙尼賽前向眾將頒布「最後通牒」暗示會踢人離隊，好彩眾將明白文帥苦心都話會爭氣，而且維拉喺3月不嬲冇運行，對住實力高幾班兼勁好火嘅曼城，睇怕都要吞蛋收場，當然捧2.05倍「讓球客勝」！

（有線200及300、廣東體育周二凌晨4:00直播）
冇貨交季尾即被「叮」

小妹仲記得曼城喺首循環5:0大炒維拉後升上英超榜首，諗住佢哋有望成功衞冕啦，點知中途愈踢愈沉，嚟到次循環面對同一對手，「藍月亮」已被曼聯遠遠拋離，難怪文仙尼都話如果呢場贏唔到，反勝機會就愈嚟愈渺茫，不過佢亦都講雖然讀書嗰陣數學唔係佢強項，但家陣仲有11場英超，如果由今場起全部贏晒，就可以攞到33分，上季剩番6場落後8分都成功後上封王，依家有成11場冇理由放棄！文帥仲使出激將法，賽前講明由今場起會觀察每個球員嘅表現，邊個冇貨交季尾就會被「叮」，希望逼到手下眾將醒醒定定做番齣好戲。

文帥求勝心切，球員絕對感受到，阿古路同耶耶托尼雖然明知爭標機會渺茫，但都走出嚟力撐球隊能夠反超曼聯振奮士氣，查實有呢兩位近兩場夾埋入4球嘅「救世主」，加埋泰維斯同迪斯高兩位後備殺手，文仙尼同球迷根本唔使擔心今場贏唔到。
維拉3月英超輸得最多

對於阿士東維拉嚟講，3月絕對係「噩夢月份」，皆因佢哋至今已經輸咗35場3月份舉行嘅英超賽事，係英超史上最高紀錄！除咗呢個「3月魔咒」，維拉今季經過27輪英超賽事後，場均失球已經去到1.93球，同雷丁並列聯賽最差防守第2位，加埋隊長華亞爾上陣成疑，對住勁有鬥心嘅曼城輸少當贏，想搶分都係寄望再下輪對雷丁嘅護級戰算咯！
藍月亮鬥維拉多波入

‧「藍月亮」曼城近5次於聯賽對阿士東維拉，有3次攻入4球或以上。

‧阿士東維拉已經連續11場聯賽未能保持清白。

‧賓迪基係2013年入球最多嘅英超球員。
維拉失球多「大」鑊

根據往績，曼城同維拉碰頭係入球騷嘅保證，佢哋近5次碰頭，就有4次出現至少3個入球，除咗兩軍嘅攻擊手如賓迪基、阿古路同耶耶托尼近況都相當好，令兩軍有力駁火外，維拉後防曳亦係有利開入球大嘅因素，相信「藍月亮」贏波之餘，1.62倍入球大都走唔甩。