緬恩斯陷低潮避之則吉

猪拉多纳

緬恩斯喺上周中德國盃8強主場對弗賴堡，開波5分鐘內就連入2球，一心諗住可以輕鬆出線，點知最後畀對手連追兩球逼和，最慘仲要喺加時失守出局收場，對球員信心同士氣帶嚟嚴重打擊，今晚重返德甲作客杜塞爾多夫竟然仲夠膽讓波，睇嚟都係避之則吉好，1.62倍「讓主」唔捧等幾時？

（有線61、64、201及204周一凌晨0:30直播）

緬恩斯喺德盃一役好似坐過山車咁，可惜升得高時亦跌得傷，仲要有守將普斯比治喺65分鐘2黃1紅被逐，連埋加時接近成粒鐘要打少一個，球員體能消耗極大，今晚又要作客出征，班波隨時踢踢吓腳仔軟都唔定，真係幾難睇好。再睇埋近況，緬恩斯2月份一共踢咗5場波竟然未贏過，今場仲有澳洲前鋒路卡維斯亞、中場艾堅蘇圖、守將卻治賀夫同埋賓格特唔踢得，真係唔明白佢哋憑咩可以讓波囉！
5戰不勝讓唔起杜塞爾多夫

升班球隊杜塞爾多夫經過季初適應期後，主場戰績日漸進步，聯賽連盃賽近8次主場出擊取得5勝2和1負，按比例計今場受讓已經有超過8成機會收錢。儘管次席射手列辛加臀部受傷，但另一前鋒比連侯辛連續兩場建功，中場羅比古斯又復出，火力絕對唔成問題，受讓更值一博！